寒風 12月29日 星期五
明日就係2006年最後一個工作天,好期待,不過依然好忙,美國工程原先估計只需要兩個月就完成,可惜前前後後改設計,又要開大會之後先至有定案,雖然各方面都已經加緊進度,但係由十月開始接手以來,除左圖紙已經畫好之外,其餘嘅事開始慢吞吞喇......
我直覺話比我知道,美國人一般都好注重聖誕節,年尾對美國人係好重要,呢一點大家都認同,至於香港人年終無休嘅態度,中國人會形容為敬業樂業,相反美國人會放鬆自我去迎接新嘅一年,美國工程唯有順延至2007年再接再厲喇~
後記: 無論是誰，都可以克服人生路上的障礙，而不失去自我。

急凍 12月28日 星期四 
男女之間時常會發生問題,金錢...坦白...感受...第三者...生活小節......通通都會影響彼此感情,只要其中一方冇辦法去接受,好好地一段愛情咁就玩完,聽落去已經覺得好可惜,如果呢D事係發生响自己身上,感受會更加強烈,我原本以為一直都唔會再有咁嘅事發生,但係事實上今個聖誕節只有我一個人過,雖然有搵朋友玩過夠,之不過心裡總係少左一個位置......女朋友的位置~
後記: 人家給您壓力，您自己化解了就不是壓力。

陰涼 12月27日 星期三
同我之前預計嘅一樣,大老闆Jimmy哥今日終於都返工,應該係話放完漫長嘅假期歸來,而最估唔到就係大老闆竟然買一大堆賭場鎖匙扣送比我地,感覺上好似多Q餘咁,不過小小心意算數吧啦! 聖誕節去美國拉斯維加斯渡過,只係想想已經覺得浪漫,如果有一年可以與心愛嘅人手拖住手,一齊漫遊美國拉斯維加斯所有嘅賭場,此生無遺了......
發完夢之後就要正式投入工作,大老闆可謂日理萬機,一早就返到公司忙過不停,其實我都冇留意老闆做緊咩,只不過有幾上廁所嘅時候,當我經過老闆房門口,就好自然咁睇睇佢部電腦,原來一係上網就一係玩接龍,唉~
後記: 音樂不僅可以是一種嗜好，還可以成為您的生命。

晴天 12月26日 星期二
假期又再一次結束,而我比其他人早了一天結束長假,今日雖然還是公司指定嘅假期,不過我唔想浪費時間,與其留响屋企發酵變酵母菌,倒不如返工好過,起碼做人夠充實先啦! 夢寐以求朝早可以九點幾起身,之後先去返工真係精神好多,搭巴士又唔使急急腳已經正爆,落車之後條街只有幾十人,比起平日上班時間有成二三百人真係無得比呀......而且公司一個人都冇,只得我,齋係呢樣嘢已經足夠喇~
後記: 生命充滿苦難和考驗，千萬別沮喪，反而要為身處崎嶇路，使耐性增長而高興。

聖誕節 12月25日 星期一
每一年嘅平安夜加上聖誕節都同唔一樣嘅朋友渡過,今年都唔例外,我覺得自己算好好彩,每一年身邊總會有一班朋友陪我,佳節只有一個人渡過嘅日子已經過去,細細個眼中就只家人,家人點樣過聖誕就要跟住,我父親大人&母親大人都好少會去街,一家人佳節多數會坐埋一齊食飯,全家人去尖沙咀欣賞燈飾已經係十多年前嘅事喇! 到左而家輪到自己安排節目,雖然再冇可能全家人一齊渡過,不過放在心中啦~
後記: 寬恕是為了自己，而不是為了別人。您須從內心寬恕，但不一定告訴作惡者。

平安夜前夕 12月23日 星期六
今日終於都接收到私幫嘅資料,比我想像中來得簡單,雖然係比較簡單而且數量唔多,但係街外錢其實都唔係咁容易比我搵到,花上係我嘅私人時間,用休息嘅時間去交換金錢,聽落去好似好容易,之不過當大家花時間專注去做一件事嘅同時,另一件事會同一時間發生,而好可能呢件事對自己嚟講係好重要,好多嘢錯過左就冇得再後悔,人生就係要咁樣先至有意思,世界係好唔公平嘅,現實生活係需要自己去取捨......得與失~
後記: 花別人的錢可以很豪爽，輸掉別人的錢同樣不會心痛。

冬至 12月22日 星期五
昨日當我同公司老闆和同事一齊去食冬至午飯嘅時候,由於我唔記得帶手機,所以冇聽兩個電話,而呢兩個電話都係同一個人打嚟,到底有咩事咁緊要呢? 竟然連續打兩次電話比我.我要補充少少,平時好少人會打比我兩次或以上,所以我覺得好出奇......
我睇返來電顯示先知道係邊個搵得我咁急,原來係我早幾個月之前,去地盤新認識嘅判頭打比我,呢個判頭(以下稱為阿休)非常之好人,因為阿休同過好多間工程公司合作,所以我一話以前响高昇做過,大家就多好多話題講喇! 一講之下就火速成為朋友,阿休打嚟就係話我知,想我幫佢手出一份圖,當然係私幫啦......
有私幫生意自動送上門機會難得,加上就嚟要過年尾關,要使多好多錢,即刻就答應阿休喇! 所以尋晚一收工就上去阿休嘅寫字樓,傾下D一般嘅細節,最基本當然要知道自己要做咩啦,聽日又再去多次阿休個寫字樓正式開工~
後記: The true friend is the one that's coming in the door while everyone else is going out. (別人都離棄您，他/她卻來看您，那才是真正的朋友。)

微冷 12月20日 星期三
好開心,好高興,好快樂,不過並唔係今日覺得,仲要過完今個禮拜先到至愛假期,連續三日嘅聖誕節假期就快到,我仲未計畫好點樣過呀......約朋友又未必得閒,因為我得閒並唔代表其他人都一樣咁得閒,不過年年都係咁過節日啦,其實玩同唔玩都冇咩大分別,只係自己想點樣去歡度佳節,或者想同咩嘢人一齊度過聖誕節,而我最想當然就係同女友過啦......可惜等足三年都未搵到,好hurt~
後記: 我喜歡思索命運─無意中聽到的一句話：鞋子裡一片小石子，也能改變世界。

回暖 12月19日 星期二
今日係個小小的大日子,但係主角非我是也,而是有一位新同事加入我地公司,他......不,她嘅職位同我地係一樣都係做設計,聽佢講過幾句說話之後,佢原先應該都係做工作,只係唔知道由邊間公司走過嚟......
先唔講佢做唔做到嘢,因為完全唔關我事嘅,而老闆請佢返嚟並唔係幫我手,禮貌就見仁見智啦,介紹嘅時候都有講聲"你好"嘅,可惜上個禮拜老闆話請左條女,今日比我見到就真係冇假嘅......係就係女人,不過竟然係一個唔似女人嘅女人,完全係大長針feel呀,如果大家有睇過TVB嘅"高朋滿坐",就應該知道邊個係大長針喇~
後記: When it comes to raising children, I believe in give and take. I give orders and they take'em. (說到養兒育女，我贊成遷就：我下命令，他們遷就。)

牙震震 12月18日 星期一 
天氣變得冰涼,我都好放心,香港都仲依然有這樣一個寒冬,如果連冬季都失去埋,大家都會少好多娛樂,時裝,美食,假期......還有溫暖感! 想起細個得十幾歲嘅時候,十二月尾已經凍得好緊要,每日就好似今日咁,得番十二三度左右,我小學五年班就搬嚟屯門住,每年一到冬天就會比九龍凍好多,起初都唔係好習慣,就算著好多好多嘅衫褲,同樣都係覺得凍,打哂冷震咁......到而家已經十幾年喇,習慣新界冬天嘅"凍",所以我比其他人早帶頸巾同冷手套~
後記: No one else, ever, will think you're great the way your mother does. (沒有人會像您母親那樣欣賞您。)